FSSH përfshin marka të reja në Listën Pozitive për barnatoret - disponueshmëri më të madhe dhe shpenzime më të ulëta.

Fondi i Sigurimit Shëndetësor (FSSH) njofton publikun se që nga qershori i vitit 2026, në grupin e barnave që jepen në barnatoret e ISHP-së në ngarkim të Fondit janë përfshirë 18 marka të reja të barnave.

Risia përfshin 16 marka për 10 barna gjenerike, të cilat, në përputhje me rregulloret në fuqi, mund të përshkruhen dhe të jepen me recetë në ngarkim të Fondit.

Nga gjithsej dhjetë grupet gjenerike, nëntë janë siguruar pa bashkëpagesë, përkatësisht 15 barna me emër të mbrojtur janë në dispozicion për personat e siguruar pa barrë shtesë financiare.

Tre barnat e mbetura, të cilat janë importuar në mënyrë ndërhyrëse për të siguruar vazhdimësinë e furnizimit pas ndërprerjes së prodhimit të barnave të disponueshme më parë, janë paraqitur me një bashkëpagesë minimale prej rreth 60 denarë, të përcaktuar nga bartësi i autorizimit për vendosje në treg. Pasqyra e detajuar është dhënë në Shtojca 1.

Ky hap është realizuar me kërkesë të prodhuesve dhe bartësve të autorizimeve për vendosje në treg, me çka Fondi mundëson zgjedhje më të gjerë të barnave, disponueshmëri më të madhe dhe shpenzime më të ulëta për personat e siguruar.

Çmime më të ulëta referente

Te pesë grupe gjenerike, markat e reja kanë çmime më të ulëta se ato të deritanishme, gjë që rezulton me ulje të çmimeve referente.

Mes tyre është edhe marka e dytë e kombinimit fiks beklometazon/formoterol (terapi inhaluese për astmë dhe SPOK), me të njëjtën përbërje dhe të njëjtën dozë, e prodhuar në një vend anëtar të Bashkimit Evropian.

Me futjen e një marke konkurruese në këtë grup terapeutik vendoset konkurrencë referente, me ç'rast çmimi referent për paketim ulet nga 2.715 në 1.915 denarë me TVSH, ndërsa bari i ri është në dispozicion pa bashkëpagesë.

Ulja nuk u bartet pacientëve si shpenzim shtesë. Përkundrazi, në të njëjtin grup terapeutik është në dispozicion një bar pa bashkëpagesë, ndërsa përfaqësuesi i markës ekzistuese paralajmëroi ulje të çmimit, me çka dukshëm do të ulet edhe bashkëpagesa për atë bar.

E zbatuar në të njëjtin vëllim të sasive të dorëzuara nga viti 2025 (57.441 receta, në vlerë prej 166,7 milionë denarë), çmimi i ri referent do të sjellë kursim vjetor të vlerësuar prej 46 deri në 49 milionë denarë, mjete që do të mundësojnë futjen e barit më të ri trekomponentësh nga i njëjti grup terapeutik. Informacione më të detajuara janë dhënë në Shtojca 2.

Më shumë barna pa bashkëpagesë

Personi i siguruar ka të drejtë të marrë bar me recetë, çmimi i të cilit është i barabartë me çmimin referent që e përcakton Fondi, pa bashkëpagesë.

Fondi punon vazhdimisht për zgjerimin e numrit të këtyre barnave dhe mirëpret çdo vendim të prodhuesve, bartësve të autorizimeve për vendosje në treg dhe Ministrisë së Shëndetësisë që kontribuon në uljen e çmimeve dhe sigurimin e më shumë barnave pa bashkëpagesë ose me bashkëpagesë më të ulët.

Bashkëpagesë paguhet vetëm për barnat nga i njëjti grup gjenerik, çmimi i të cilave është më i lartë se çmimi referent, ku diferencën e mbulon vetë pacienti, në përputhje me parimet e sistemit referent.

Cilësia, efikasiteti dhe siguria mbeten prioritet kryesor

Të gjitha barnat që janë në qarkullim, përfshirë edhe ato në Listën Pozitive, i përmbushin të njëjtat kritere të rrepta për cilësi, efikasitet dhe siguri.

Ato janë të miratuara nga Agjencia për Barna dhe Pajisje Mjekësore (MALMED), pas së cilës Ministria e Shëndetësisë e përcakton çmimin e tyre.

Pavarësisht nëse bëhet fjalë për bar origjinal apo gjenerik, standardet rregullatore janë identike, ndërsa çdo pacient merr terapi të përshtatshme, efikase dhe të sigurt.

Menaxhim racional sipas standardeve ndërkombëtare

Në përputhje me rekomandimet dhe standardet e Organizatës Botërore të Shëndetësisë, Fondi e avancon përdorimin e barnave gjenerike si model i dëshmuar për përdorimin racional të mjeteve publike, pa kompromis në cilësinë e trajtimit.

Në kushte të nevojave të rritura shëndetësore dhe burimeve të kufizuara buxhetore, kjo qasje mundëson disponueshmëri më të madhe të terapisë dhe përdorim më efikas të mjeteve, me pacientin në qendër të sistemit shëndetësor.

Për këtë dëshmojnë edhe 27,3 milionë receta të realizuara (mesatarisht 15 për person të siguruar) dhe 3,6 miliardë denarë të shpenzuara për barna me recetë gjatë vitit 2025.

Fondi mbetet i përkushtuar ndaj qëllimit të tij strategjik - sigurimit të terapisë më të qasshme, përdorimit më efikas të mjeteve publike dhe avancimit të kujdesit shëndetësor për çdo person të siguruar. Në këtë drejtim, së shpejti do të pasojë edhe një zgjerim i ri i Listës Pozitive A.