Перински и Клековски во Клиничката болница – Штип

Перински и Клековски во Клиничката болница – Штип: Нов концепт за современ здравствено-образовен комплекс вреден 109 милиони евра
Вршителот на должноста директор на Фондот за здравствено осигурување, Златко Перински, заедно со министерот за здравство д-р Сашо Клековски, заменик министерот за здравство Јовица Андовски, градоначалникот на Општина Штип Иван Јорданов и претставници на Светска банка, денес остварија работна посета на Клиничката болница – Штип, каде што се запознаа со новиот концепт за реализација на проектот за доизградба и модернизација на болницата.

Делегацијата беше пречекана од претседателката на Управниот одбор на Клиничката болница – Штип, д-р Билјана Ефтимова, која ги презентираше предвидените активности и развојните планови поврзани со оваа значајна здравствена инвестиција.

Проектот, чија проценета вредност изнесува 109 милиони евра, претставува една од најзначајните капитални инвестиции во македонското здравство и има цел да ја зајакне улогата на Клиничката болница – Штип како регионален здравствен центар за источниот дел од државата.
Новиот концепт не се однесува само на доизградба и модернизација на болничките капацитети, туку предвидува развој на современ здравствено-образовен комплекс. Во рамките на проектот се предвидени нов Медицински факултет, студентски дом, современа инфраструктура, интеграција на нова медицинска и информатичка опрема, како и целосно уредување на придружните содржини.

На овој начин ќе се создадат подобри услови за лекување на пациентите, образование и практична настава во областа на медицината, научноистражувачка работа и стручно усовршување на медицинскиот кадар. Поврзувањето на здравствената и образовната компонента ќе придонесе и за задржување и развој на стручниот медицински кадар во регионот.

Реализацијата на проектот ќе овозможи поквалитетни и подостапни здравствени услуги за граѓаните од источниот регион, ќе ги зајакне регионалните болнички капацитети и ќе ја намали потребата пациентите да патуваат и да се упатуваат на лекување во Универзитетскиот клинички центар во Скопје.
Фондот за здравствено осигурување ги поддржува стратешките инвестиции насочени кон модернизација на здравствената инфраструктура, унапредување на условите за лекување и приближување на квалитетните здравствени услуги до граѓаните. Зајакнувањето на регионалните клинички болници е значаен чекор кон поефикасен, достапен и одржлив здравствен систем.