Светски ден на дебелината
По повод Светскиот ден на дебелината, денеска во Националната галерија „Чифте Амам“ беше промовирана националната едукативна кампања „Круг на поддршка – за тежината да стане полесна“, во организација на Научното здружение за обезност ОБЕМ, со поддршка на Министерството за здравство, Фондот за здравствено осигурување на Република Северна Македонија и Светската здравствена организација.
На настанот се обрати и генералниот директор на Фондот за здравствено осигурување,г.р Сашо Клековски, кој истакна дека дебелината претставува еден од најсериозните здравствени предизвици на современото општество.
„Дебелината е здравствен предизвик на 21 век и е тесно поврзана со животните навики, физичката неактивност и современиот начин на исхрана. Затоа Фондот за здравствено осигурување ја дава својата целосна поддршка на оваа кампања, чија цел е подигнување на јавната свест и поттикнување на општествен дијалог за превенција и справување со овој растечки здравствен проблем“- истакна Клековски.
Покрај поддршката на кампањата, Фондот укажува и на потребата од отворена општествена дебата за два значајни фактори кои придонесуваат за зголемување на дебелината – прекумерната консумација на засладени пијалоци и високо процесирана храна (т.н. „џанк фуд“).
Во таа насока, беше потенцирана потребата од разгледување на можноста за воведување на данок на пијалоци засладени со шеќер (SSB – Sugar Sweetened Beverage Tax), мерка која во последната деценија е воведена во повеќе од 110 земји во светот. Целта на оваа мерка е намалување на консумацијата на пијалоци со додаден шеќер, а средствата собрани од овој данок да се насочат кон здравствени програми и превентивни активности.
Истовремено, беше повторно потенцирана потребата од забрана на продажба на „џанк фуд“ во училиштата, како и потребата од редизајн на училишната исхрана, со поголемо присуство на свежа и здрава храна. Дополнително, беше истакната и важноста од поддршка на иницијативи како што се училишните градини, кои имаат значајно влијание во формирањето здрави навики кај децата.
Фондот за здравствено осигурување обезбедува поддршка и за современи медицински третмани за дебелината, вклучително и терапија со лекови и баријатрична хирургија, но експертите нагласуваат дека овие третмани можат да дадат трајни резултати само доколку се проследени со долгорочна промена на животниот стил, здрави навики во исхраната и зголемена физичка активност.
Кампањата „Круг на поддршка – за тежината да стане полесна“ има за цел да ја подигне јавната свест за дебелината како хронична болест, да поттикне поголема институционална и општествена поддршка и да помогне во создавање средина која ги охрабрува граѓаните да водат поздрав начин на живот.
Видеото од настанот може да го погледнете тука.
