Fjalim i drejtoreshës së FSSHM-së, MSc Maja Parnardzhieva Zmejkova, me rastin e manifestimit për shënimin e Ditës Botërore të Veshkave

Të nderuar përfaqësues të mediave, të nderuar akademikë, të nderuar profesorë, doktorë, persona të siguruar dhe të nderuar pacientë, dua t'ju falënderoj për ftesën tuaj që të jem pjesë e manifestimit për shënimin e Ditës Botërore të Veshkave për vitin 2014. Njëkohësisht e përshëndes iniciativën për ngritjen e ndërgjegjësimit publik për sëmundjen kronike të veshkave në procesin e plakjes së të gjithë popullsisë. Është nder i madh të jem e pranishme këtu, ku edhe një herë do të shqyrtohen të gjitha aspektet e sëmundjeve nefrologjike, trajtimi me dializë dhe në fokus sërish do të theksohet rëndësia e transplantimit të veshkës si metoda më e mirë terapeutike. Nga sëmundjet e veshkave, në botë aktualisht janë të sëmurë më shumë se 500 milionë njerëz, që do të thotë se përafërsisht çdo i dhjeti i rritur në tokë ka ndonjë sëmundje të veshkave. Rreth 1,5 milionë njerëz jetojnë me ndihmën e zëvendësimit artificial të funksionit të veshkave, ndërsa në botë mesatarisht pritet rreth shtatë vjet për transplantim të veshkës.